فى راى ناس كتير الاسم حاجة مهمة .. لكن ايه المهم فى كلمة انت ما اخترتهاش ؟؟!!! 
انا بشوف الاسم مجرد علم بتعرف بيه نفسك .. الاسم مش بيقول انت مين و لا انت ايه ؟؟ مجرد كنية او علامة , فى رأى مجرد كلمة من كام حرف بيحاول الناس يعرفونا بيها ..
مصرية دا مش اسم او علامة او كنية او غيره .. دا شعور ليه لذه تانى ليه طعم مختلف .. كأن كل حرف شايل جواه ريحة النيل و شمس بلدى البهية سمار شبابها او ريحة الوطن فى حاراتها .. بجد شعور غريب انك توصف بلدك .. بتحس انها اجمل و احلى بلد فى العالم كله و لو سالت اى شخص اوصف بلدك فى كلمتين .. بيحس بقلة الحيلة , عمر ما حب وطن اتوصف او اتحدد فى إطار حروف فارغة مهما حاولنا نخليها عذبة بتفضل كمات تافهة مش بتوصف شعور غريب جوانا .. حب فطرى نقى اوى اسمه حب البلد .. حب الوطن , و اصعب شعور تحسه انك تكون فى بلدك غريب .. مفيش وطن و الوطن بقى حكر عليك .. لما اشوف ان الاتفاق فى بلدى بقى الاختلاف و ان الاختلاف بقى شئ طبيعى يخليك مهان !!!! 
لما يكون جيران الباب فى الباب و القطيعة بينهم متتوصفش .. بعد ما اتعودوا يشاركوا بعض فى قعدة سمر حوالين كباية شاية محلية .. بقيت بحس الشوارع حزينة و البلد مليانة ناس كئيبة ... شوارع زحمة بس فارغة  .. ضحكة مرسومة ع الشفايف بس وراها الف دمعة .. دلوقتى بقى كل بيت مصرى جواه شهيد و كل شهيد شايل معاه جوا قبره قصة .. بقينا نصحى على خبر يبكى و نام على خبر يبكى وبجد بدون اى مبالغة بعد ما كانت مصر تفضل صاحية شوارعها لحد الفجر بقت الشوارع تموت بناسها قبل المغرب .. مش هى دى مصر اللى عرفتها , موجوعة اوى على بلدى .. و مهما اتكلمت و اتكملت كتير مفيش كلام يتقال و مفيش كلام يتوصف .....................